İmişli Şəkər Zavodunun inşaat işlərinə 2003-cü ildə, ümummilli lider Heydər Əliyevin xeyir-duası ilə başlanılmışdır. İmişli şəhərində 70 hektar ərazidə inşa olunan müəssisəyə ilkin mərhələdə 83 milyon ABŞ dolları məbləğində investisiya qoyulmuşdur. Dünya standartlarına cavab verən texnologiyalar ilə təchiz edilmiş İmişli Şəkər Zavodunun layihə və montaj işləri Almaniya, Polşa, Türkiyə və Ukrayna mütəxəssislərinin nəzarəti altında azərbaycanlı mühəndis və montaj heyəti tərəfindən həyata keçirildi.
23 Mart 2006-cı ildə Azərbaycan Respublikasının Prezidenti cənab İlham Əliyevin iştirakı ilə İmişli Şəkər Zavodunun rəsmi açılış mərasimi keçirildi. Regionların Sosial-İqtisadi İnkişafı Dövlət Proqramında qabaqcıl rol oynayan İmişli Şəkər Zavodu hazırda şəkər tozu, heyvan yemi, kəllə qənd və etanol istehsalı sahələrində fəaliyyət göstərir. Bu gün İmişli Şəkər Zavodu bölgənin inkişafında və sənayeləşməsində mühüm yer tutur.
İmişli Şəkər Zavodunun gündəlik emal gücü 5 min ton şəkər çuğunduru və ya 1800 ton xam şəkərdir. Müəssisə, şəkər çuğunduru və xam şəkəri bir yerdə emal etmək üçün müvafiq texnologiyalarla təchiz edilmişdir. Müəssisənin şəkər çuğunduru ilə təmin edilməsi məqsədilə ətraf rayonlarda şəkər çuğunduru becərilməsi üçün sahibkarlarla iş münasibətləri qurulmuşdur.
2010-cu ildən müəssisənin tərkibində Qarışıq Yem və Bitki Yağları fabriki fəaliyyətə başlamışdır. Müəssisədə, müxtəlif ev heyvanları üçün yem məhsulları istehsal edilir. Damazlıq, südçülük, broyler, yumurta, cücə, bildirçin və balıqçılıq təsərrüfatlarının ehtiyaclarına uyğun məhsul istehsal edilmsi məqsədilə heyvandarlıq təsərrüfatları ilə sıx əməkdaşlıq edilir və məhsulların rasyon tərkibnin təkmilləşdirilməsi istiqamətində daima iş aparılır.
2012-ci ildən müəssisədə Kəllə Qənd fabriki istismara verilmişdir. Kəllə Qənd fabrikində Azərbaycanın ənənəvi şəkər məhsulu olan kəllə qənd istehsal edilir. Müsair istehsal texnologiyalarına əsaslanan müəssisə, kəllə qəndin ənənəvi xüsusiyyətlərinin əldə edilməsi üçün zəruri olan avadanlıqlarla təchiz edilmişdir. Müəssisənin gündəlik məhsuldarlığı 200 ton qablaşdırılmış kəllə qənd məhsuludur.
Azərbaycanda qurulan bu ilk şəkər zavodu keçən zaman ərzində bölgənin inkişafına böyük təkan vermişdir. Regionda yaşayan çox saylı məcburi köçkün bu zavod ilə iş imkanı əldə etmiş və gəlir səviyyəsi yüksəlmişdir. Bu da öz növbəsində regional iqtisadi aktivliyin daha da artması ilə nəticələnmişdir. Müəssisədə daima ətraf mühitin qorunub saxlanması və abadlaşdırılması üçün iş aparılır.