"HR şirkət rəhbərliyi üçün əhəmiyyətli deyil", "HR-a kifayət qədər dəyər verilmir", "xarici ölkələrdə HR strateji bir funksiyadır, Azərbaycanda isə onun biznes nəticələrinin əldə edilməsinə təsiri başa düşülmür" kimi ifadələri mütəmadi olaraq eşidirik. Bütün bunlar doğrudur. Bəli, ölkəmizdə insan resurslarının idarə edilməsi ilə biznes strategiyasının reallaşması arasında əlaqə çox zəifdir.

HR -ın strateji olmasını istəyirik, onun şirkətin biznes hədəflərinə çatmasında vacibliyinin qəbul edilməsini istəyirik, lakin istəyimizin reallaşmamasının səbəbləri ilə bağlı nə qədər təhlil aparmışıq? ölkəmizdə HR-ın strateji olmamasında bu sahədə işləyən insanlar kimi öz təqsirimizin olduğunu qəbul edirikmi?

Strategiyaya təsir etmək istəyirik lakin nə zaman şirkətimizin strategiyasını təhlil etmişik? Ətrafda baş verən siyasi, iqtisadi, sosial, hüquqi və texnoloji məsələlərin işlədiyimiz şirkətin gələcək fəaliyyətinə təsirini nə zaman araşdırmışıq? Şirkətin illik hesabatını nə zaman təhlil etmişik? 1, 3, 5 il ərzində şirkətin hansı istiqamətdə irəliləyəcəyini və qarşılaşa biləcəyi riskləri başa düşürükmü?

Təəssüflər olsun ki, əksər hallarda yuxarıdakı suallara "etmirik", "bütün bunlar əhəmiyyətli deyil", "biz niyə etməliyik?", "şirkətin rəhbərliyi var qoy onlar təhlil etsinlər" kimi cavablar veririk. Maraqlı mənzərənin şahidi oluruq, HR-ın strateji rolda olmasını istəyirik amma heç şirkətin strategiyasının nədən ibarət olduğu haqqında düşünmürük. Sizcə belə olduqda biz necə strateji funksiyaya çevrilə bilərik? Əgər vaxtımızın böyük bir hissəsini gündəlik təkrarlanan administrativ işlərə sərf edəcəyiksə o zaman ölkədə HR -ın daha dəyərli bir funksiya kimi qəbul edilməsi üçün uzun zaman tələb olunacağını proqnozlaşdırmaq olar.

Bunlardan əlavə, əksər hallarda HR funksiyası bu sahədə və ya biznesin idarə edilməsi üzrə təhsil almamış işçilərdən təşkil olunur. Təbii ki, belə olduqda biznesin hansı şəkildə təşkil olunduğu haqqında fundamental nəzəri bilikləri olmayan işçidən şirkətin gələcək fəaliyyətini təhlil etməsini gözləmək çətin olur. Bu məsələni həll etmək olar. Artıq özümüzün fərdi inkişaf ehtiyacımızı müəyyən etdik. Hər zaman şirkətin işçilərinin təlim və inkişafını təşkil edirik, artıq qeyd edilən məsələ ilə bağlı özümüzün inkişafını planlamalıyıq.

Yazımın məqsədi cari vəziyyəti tənqid etmək deyil. Məqsədim HR-ın şirkətdə dəyərli olub-olmamasının bizdən də asılı olması fikrini bildirməkdir. Özümüzün təqsirini qəbul etməyimiz və bunun qarşısını almaq üçün hər hansı bir tədbir görməyimiz cari vəziyyətin düzəlməsi üçün ilk addım ola bilər.

Düşünürəm ki, bizim qarşımıza qoyduğumuz sual məzmun və mahiyyət etibarilə dəyişilməlidir. "Niyə bizdə HR strateji deyil?" sualını kənara qoyub, "Şirkətimizin strategiyası nədən ibarətdir?" sualını gündəmdə saxlamalıyıq. Belə olduqda dəyərimizin artması istiqamətində əhəmiyyətli irəliləyiş etmiş oluruq. Həmçinin, bizi maraqlandıran sualın dəyişilməsi HR funksiyasının transformasiya edilməsində məsul şəxsi də dəyişir. Artıq bu işdə ətraf mühit deyil biz məsuliyyətliyik.

Müəllif: Nurlan Şixəliyev