Çox zaman gündəlik və iş həyatımızdakı problemlərimizi çətinləşdiririk. Sadə həlli olan, necə deyərlər kiçik bir ‘action’ tələb edən məsələlər haqqında saatlarla düşünüb hərəkətə keçmirik. Həm də hansısa mövzularda özümüzü göstərə bilmək, bir söz demək üçün özümüzə dəxli olan-olmayan bir çox məsələləri öyrənib həyatımızı daha da qəlizləşdiririk. Bu azmış kimi, konfranslar, böyük həngamələr təşkil edib sadə məsələləri günlərlə müzakirə edirik.

Əslində isə həyatda bir çox fundamental məsələlər var ki, onları düşünüb həyatımızı çox sadələşdirə bilərik. Bu məsələlər haqqında hər birimiz məlumatlıyıq. Sadəcə özümə və sizə xatırlatma kimi ara-sıra bundan sonra istərdim ki, uzun fikirlərim olanda Facebook-dan, qısa fikirlərim olanda isə o qədər də aktiv olmadığım Twitter hesabımdan bir çox bəsit məsələlər haqqında car çəkim. İndi ağlıma gələn bir neçə fikri isə bu kampaniya çərçivəsində məhz ilk dəfə burada sizinlə paylaşıram :)

• İnsanlar nə qədər sizi həvəsdən salır salsın, əgər bir iş üçün can qoyursunuzsa mütləq bəhrə görəcəksiniz, hətta uğursuzluq belə sizə nə isə öyrədəcək. #buqederbesit
• Brendlər emosiyalarımızla istədiyi oyunu oynayırlar, bir ortamda ki, Samsung və Apple istifadəçiləri, Real və Barca azarkeşləri, X dini təriqəti və Y dini təriqətinin inanclılarının söhbətləri varsa bu sadəcə brendlərin davasıdır. Bu davalara qoşulub vaxt itirməyin, həyat çox qısadır. #buqederbesit
• İnsan 3 il Marsda yaşayıb Tovuz kartofundan geri qalmayan kartof yetişdirirsə bu yer-torpaq səni acmı buraxacaq? Buraxacaq, əgər tənbəllik edib nə isə öyrənməsən, çalışmasan pulun ancaq çörəyə çatacaq. #buqederbesit
• Müəllimin çətinliklə elədiyi məsələni, bir şagird qısa zamanda həll edərsə belə onun qısqanclığının səviyyəsi heç zaman çətinliklə problem həll edən menecerin daha rahat həll yolu tapan işçisinə olan qısqancılığından çox ola bilməz. Həyatınız boyu sizi öyrədən müəllimlərin yanında olmağa çalışın. #buqederbesit
• Əgər sürücü və ya piyada kimi yol qaydalarına riayət edirsinizsə az ehtimal var ki, polis sizi saxlayacaq və sonra da siz Turala zəng vurub öz günahınızı günahsızlaşdırmaq istəyəcəksiniz. #buqederbesit

Yazdıqlarım və yazacağım fikirlər qətiyyən mənə aid aforizmlər filan deyil. Əminəm ki, bu fikirlərdən bir çoxuna hardasa rast gəlmisiniz. Bir çox bəsitlərlə gələcəkdə hətta razı olmayacaqsız. Buradakı fikirlər bəzən öz dediklərimizi də inkar edə biləcək. Amma təcrübə göstərir ki, problemi həll etmək, yaradıcı olmaq, uğur qazanmaq məhz sadə və obyektiv yanaşma sayəsində olur.

Sözümün canı odur ki, kütləvi təbliğatlar, şüuraltı fikirlərimiz, qayğılarımız, eyni anda bir neçə iş ilə məşğul olmağımız bizi də kütləviləşdirir və bir çox sadə məsələyə hər şeyi çətin görən gözlərimizlə baxırıq. Yenidən uşaq ola bilmə şansımızın az olduğunu düşünərək, heç olmasa müdrik gözlərə sahib olmağı hər birimizə arzulayıram.

Müəllif : İlham Yusifov