ADA Universiteti - Azərbaycan Diplomatik Akademiyası

Azərbaycan Diplomatik Akademiyası (ADA) Azərbaycan Respublikası Prezidenti tərəfindən 15 dekabr 2006-cı il tarixli, 488 nömrəli fərmanı ilə Xarici İşlər Nazirliyinin nəzdində təsis edilmişdir. 13 yanvar 2014-cü il tarixində Azərbaycan Respublikası Prezidentinin Sərəncamı ilə Azərbaycan Diplomatik Akademiyası və İnformasiya Texnologiyaları Universitetinin əsasında Azərbaycan Respublikası Xarici İşlər Nazirliyinin nəzdində fəaliyyət göstərən "ADA" Universiteti yaradıldı.

ADA-nın missiyası

• Qlobal perspektivə malik gələ cək liderlər və məsuliyyətli vətəndaşlar yetişdirmək
• İnteraktiv üsul və tələbəyə xüsusi yanaşma tətbiq etməklə komanda işi, analitik və kritik düşüncə, təşəbbüskarlıq kimi keyfiyyətləri tələbələrdə inkişaf etdirmək
• Praktika və nəzəriyyənin kombinasiyası üzərində qurulmuş və dünya standartlarına uyğun müasir təhsil sistemi qurmaq
• Təhsildə elm və tədqiqatın inkişafına şərait yaratmaq

ADA-nın xidmətləri

• Xarici və azərbaycanlı professorlardan ibarət pedaqoji heyət
• Xarici universitetlərdə tələbə mübadilə proqramları
• Ölkədə ən zəngin xarici dilli kitabxana və elektron məlumat bazası
• Müasir standartlara cavab verən tələbə şəhərciyi
• Tələbənin karyerasına və peşəkar inkişafına fərdi yanaşma
• Təhsil müddətində universitet şöbələri nəzdində işləmək imkanı
• Aktiv sosial fəaliyyət və tələbə təşkilatlarında layihələr
• Müxtəlif ölkələri təmsil edən tələbələrdən ibarət təhsil mühiti

İntensiv İngilis dili proqramı

ADA Universitetində bakalavriat səviyyəsində təhsil 4 illikdir və ingilis dilində aparılır. İngilis dili səviyyəsi aşağı olan tələbələr bir il İntensiv İngilis Dili Proqramında təhsil almalıdırlar. Bu proqram çərçivəsində yazılı və şifahi formalarda ingilis dilindən peşəkar səviyyədə istifadə kimi bacarıqların öyrədilməsi təklif olunur. Həmin proqrama tələbələrin yerləşdirilməsi Tələbə Qəbulu üzrə Dövlət Komissiyasının (TQDK) bakalavriat səviyyəsinə qəbul imtahanlarından sonra aparılır və tələbələrin ingilis dili bilikləri ADA Universitetində yoxlanılır.İngilis dili səviyyəsi ADA-nın tələblərinə uyğun olan abituriyentlər (ADA imtahanından 60 bal, TOEFL IBT 75, IELTS 6.0) birbaşa bakalavriat proqramına başlayırlar. Uyğun olmadığı halda, tələbələr İntensiv İngilis Dili Proqramını keçməlidirlər.